ខេត្តសៀមរាប ៖ កាលពីថ្ងៃទី៤ ខែ កក្កដា ឆ្នាំ២០២១នេះ លោក អែល សៀត សមាជិកក្រុមប្រឹក្សាខេត្ត និងជាប្រធានក្រុមការងារដោះស្រាយបញ្ហាគ្រោះមហន្តរាយ ដែលបណ្តាលមកពីការរីករាលដាលនៃជម្ងឺកូវីដ-១៩ របស់សហគមន៍ខ្មែរអ៊ិស្លាមខេត្ត បានដឹកនាំក្រុមការងារចុះទៅកាន់ទីតាំងដីសម្រាប់ត្រៀមទុកបញ្ចុះស.ពសាសនិកអ៊ិស្លាមក្នុងករណីស្លា.ប់ដោយសារឆ្លងជម្ងឺកូវីដ-១៩ នៅក្នុងភូមិគោកក្រើល ឃុំលាងដៃ ស្រុកអង្គរធំ ខេត្តសៀមរាប។
ក្នុងការជីករណ្តៅទុកត្រៀមសម្រាប់បញ្ចុះស.ពរបស់បងប្អូនសាសនិកអ៊ិស្លាមដែលស្លា.ប់ដោយសារជម្ងឺកូវីដ-១៩ បានធ្វើឡើងដោយគោរពតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីពេលកន្លងមក។ ក្នុងការចុះទៅពិនិត្យ និងជីករណ្តៅសម្រាប់ត្រៀមទុកបញ្ចុះស.ពនោះ ក៏មានការអញ្ជើញចូលរួមពីសំណាក់លោក ឡុង រដ្ឋារក្ស អភិបាលនៃគណ:អភិបាលស្រុកអង្គរធំ និងលោកអធិការស្រុក លោកមេបញ្ជាការកងរាជអាវុធហត្ថស្រុក ព្រមទាំងមានអាជ្ញាធរភូមិ ឃុំគោកគ្រើល ចូលរួមផងដែរ ។
ក្នុងឱកាសនោះដែរ លោក អែល សៀត សមាជិកក្រុមប្រឹក្សាខេត្ត និងជាប្រធានក្រុមការងារនេះ បានមានប្រសាសន៍ថា ចំពោះការជីករណ្តៅត្រៀមទុកនេះ គឺមិនមែនជាការប្រមាថដល់អាយុជីវិតរបស់បងប្អូនសាសនិកអ៊ិស្លាម ដែលបានឆ្លងជម្ងឺកូវីដ-១៩នោះទេ គឺគ្រាន់តែដើម្បីរៀបចំត្រៀមទុកការពារទុកជាមុន និងដើម្បីគាំទ្រដល់ក្រុមការងារដែលត្រូវរៀបចំបញ្ចុះស.ពឲ្យប្រព្រឹត្តទៅដោយរលូន និងទាន់ពេលវេលាតែប៉ុណ្ណោះ ។
លោកក៏បានមានប្រសាសន៍បញ្ជាក់ថា ពេលនេះ ក្រុមការងារបានធ្វើការជីករណ្តៅត្រៀមទុកបញ្ចុះស.ពបានចំនួន៥រណ្តៅហើយចំពោះការជីករណ្តៅត្រៀមទុកសម្រាប់បញ្ចុះស.ពនេះ គឺជាថវិការបស់បងប្អូនសប្បុសរសជនខ្មែរសាសនិកអ៊ិស្លាមក្នុងខេត្តសៀមរាប ដែលបានចូលរួមបរិច្ចាគដល់ក្រុមការងារ ដើម្បីដោះស្រាយបញ្ហាគ្រោះមហន្តរាយដែលបណ្តាលមកពីការឆ្លងរីករាលដាលនៃជម្ងឺកូវីដ-១៩ ៕
