រាជធានីភ្នំពេញ ៖ សត្វតោ ឈ្មោលមួយក្បាល ដែលសម្តេចតេជោ ហ៊ុន សែន នាយរដ្ឋមន្ត្រីនៃកម្ពុជា បានប្រកាសកាលពីវេលាម៉ោងជិត១១យប់ថ្ងៃទី៤ កក្កដា ២០២១នេះ ដោយសម្រេចអនុញ្ញាតឲ្យយកទៅចិញ្ចឹមនៅផ្ទះវិញ និងតម្រូវឲ្យធ្វើតាមលក្ខខណ្ឌមួយចំនួននោះ ម្ចាស់សត្វតោ ជាជនជាតិចិន បានថ្លែងអំណរគុណដល់សម្ដេចតេជោ និងសុំជូនពរអោយកម្ពុជា និងចិន ជាមិត្តដែកថែបជារៀងរហូត ។
គណនីហ្វេសប៊ុក ដែលមានឈ្មោះ Qi Xiao ប្រហែលជាម្ចាស់នៃសត្វតោ បានសរសេរថា «ជាបឋម សូមថ្លែងអំណរគុណយ៉ាងខ្ពង់ខ្ពស់ដល់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានយកចិត្តទុកដាក់ ចំពោះបញ្ហានេះ ។ ហើយក៏សូមអរគុណដល់ថ្នាក់ដឹកនាំគ្រប់ជាន់ថ្នាក់ផងដែរ និងពុកម៉ែបងប្អូនប្រជាជនកម្ពុជាទាំងអស់ ដែលបានជួយ និងគាំទ្រដល់ “ហ៊ីម៉ា” ឈ្មោះរបស់សត្វតោ របស់យើងខ្ញុំផងដែរ ធ្វើអោយខ្ញុំបាទ រស់នៅក្នុងប្រទេសកម្ពុជា យ៉ាងមានអារម្មណ៍កក់ក្តៅ ជាចុងក្រោយ សុំជូនពរអោយកម្ពុជា និងចិន ជាមិត្តដែកថែបជារៀងរហូត» ។
បន្ថែមលើនេះ សម្តេចតេជោ ក៏បានបញ្ជាក់ទៅម្ចាស់សត្វតោ ជាជនជាតិចិន ដែរថា «Qi Xiao ប្រហែលលោកជាម្ចាស់ នៃសត្វតោដែលខ្ញុំគួរតែបញ្ជាក់ថា នេះជាករណីពិសេស ដោយលោកបានចិញ្ចឹមតោនេះ តាំងពីតូចរហូតធំ ដែលតោនេះ ប្រៀបដូចជាសមាជិកគ្រួសារទៅហើយ ទើបអនុញ្ញាតជាករណីពិសេស ឲ្យលោកយកទៅចិញ្ចឹមវិញ ។ ដូចការបញ្ជាក់របស់ខ្ញុំ សូមលោកធ្វើទ្រុង ឲ្យបានល្អ ដើម្បីសុវត្ថិភាពមនុស្សក្នុងផ្ទះ និងអ្នករស់នៅជិតខាង និងក៏ត្រូវគិតដល់សុខភាព នៃសត្វតោ ផងដែរ» ។
គួរជម្រាបផងដែរថា សម្តេចតេជោ បានប្រកាសយ៉ាងដូច្នេះថា «ក្រោយក្តាប់បានរឿងសត្វតោ ។ ល្ងាចនេះ ខ្ញុំបានពិភាក្សាជាមួយរដ្ឋមន្ត្រីក្រសួងកសិកម្ម និងបានឯកភាពគ្នាថា អនុញ្ញាតឲ្យម្ចាស់យកទៅចិញ្ចឹមវិញ ក្នុងលក្ខណ្ឌម្ចាស់ត្រូវធ្វើទ្រុង ឲ្យបានត្រឹមត្រូវ ដើម្បីធានាសុវត្តិភាពទាំងមនុស្សក្នុងផ្ទះ និងអ្នករស់នៅជិតខាង ។ អរគុណបងប្អូនជនរួមជាតិទាំង ក្នុងនិងក្រៅប្រទេស ដែលបានផ្តល់យោបល់ និងអាណិតដល់សត្វតោ» ។
សូមរម្លឹកថា តោឈ្មោលមួយក្បាល មានទម្ងន់ជាង ៧០គីឡូក្រាម ត្រូវបានបុរសជនជាតិចិន ចិញ្ចឹមតាំងពីតូចរហូតដល់ពេលនេះមានអាយុប្រមាណ ១ឆ្នាំ៦ខែ ដោយក្នុងមួយថ្ងៃ បរិភោគសាច់ប្រមាណ៦គីឡូក្រាម ត្រូវបានអាជ្ញាធរចម្រុះ នៃខណ្ឌរដ្ឋបាលព្រៃឈើភ្នំពេញ សហការជាមួយព្រះរាជអាជ្ញារងអមសាលាដំបូងរាជធានីភ្នំពេញ និងមានការចូលរួមពីអង្គការសម្ព័ន្ធមិត្តសត្វព្រៃ Wildlife Alliance ព្រមទាំងសមត្ថកិច្ចចម្រុះមូលដ្ឋាន ចុះដកហូត យកសត្វតោឈ្មោលរស់មួយក្បាលពីជនជាតិចិន ដែលបានចិញ្ចឹមដោយខុសច្បាប់ នៅក្នុងលំនៅដ្ឋានរបស់ខ្លួន កាលពីថ្ងៃទី ២៧ ខែមិថុនា កន្លងទៅនឹងយកទៅដាក់នៅសួនសត្វភ្នំតាម៉ៅ ។
ក្រោយការដកហូតសត្វតោឈ្មោលមួយក្បាលនេះ រួចមក ក៏មានជជែកដេញដោលពេញបណ្តាញសង្គម ដោយមានមតិគាំទ្រ ឲ្យដកហូត និងមានមតិមិនគាំទ្រ ដោយលើកឡើងថា គួរតែឲ្យម្ចាស់ចិញ្ចឹមបន្ត ដោយសារតែចិញ្ចឹមតាំងពីតូចមានមនោសញ្ចេតនាជ្រាលជ្រៅជាមួយម្ចាស់ និងសត្វតោនោះស្លូតលេងប្រលែងជាមួយសត្វចិញ្ចឹមផ្សេងទៀត ដូចជា សុនខ ជាដើម ៕
