ខេត្តតាកែវ ៖ រដ្ឋបាលខេត្តតាកែវរៀបចំបើកយុទ្ធនាការចាក់វ៉ាក់សាំង ប្រភេទស៊ីណូវ៉ាក់ ជូនពលរដ្ឋព្រះសង្ឃ មន្ត្រីរាជការ និងកម្មករកម្មការិនី នៅទូទាំងស្រុកត្រាំកក់ មានចំនួនជាង១២ម៉ឺននាក់ក្រោមអធិបតី លោក ច័ន្ទ សារុន អ្នកតំណាងរាស្ត្រមណ្ឌលតាកែវ និងលោក អ៊ូច ភា អភិបាលខេត្តតាកែវ នៅព្រឹកថ្ងៃទី២៩ ខែមិថុនា ឆ្នាំ២០២១ ។
ដោយមានការចូលរួមពី លោក វេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្ត អាជ្ញាធរស្រុកត្រាំកក់ និងអាជ្ញាធរពាក់ព័ន្ធ បានអញ្ជើញបើកយុទ្ធនាការចាក់វ៉ាក់សាំង ប្រភេទស៊ីណូវ៉ាក់ ចំនួន ២៤ម៉ឺនដូស ដើម្បីចាក់ជូនបងប្អូន ប្រជាពលរដ្ឋ ជូនពលរដ្ឋ ព្រះសង្ឃ មន្ត្រីរាជការ និងកម្មករ កម្មការិនី នៅទូទាំងស្រុកត្រាំកក់ មានជាង១២ម៉ឺននាក់ ។
លោក ចន្ទ័ សារុន មានប្រសាសន៍នាឱកាសអញ្ជើញបើកយុទ្ធនាការចាក់វ៉ាក់សាំងជូនពលរដ្ឋនៅទូទាំងស្រុកត្រាំកក់ បានលើកឡើងថា ការចាក់វ៉ាក់សាំងគឺ ជាការការពារពីការឆ្លងនៃជំងឺកូវីដ-១៩ មិនមែនជាកន្លែងប្រភពចម្លងមេរោគកូវីដនោះទេ ដូច្នេះសូមបងប្អូនប្រជាពលរដ្ឋ ដែលអញ្ជើញមកទទួលការចាក់វ៉ាក់សាំង សូមគោរពទៅតាមគោលការរបស់ក្រសួងសុខាភិបាល ដោយរក្សា គម្លាតឱ្យបានត្រឹមត្រូវ មិនមែនមកប្រមូលផ្តុំគ្នាដែលជាហេតុនាំឲ្យមានការចម្លងជំងឺនោះទេ ។
លោក ច័ន្ទ សារិន បានបញ្ជាក់ថា ចំពោះការចាក់វ៉ាក់សាំងការពារជំងឺកូវីដ-១៩ នេះ គឺមិនមានការយកលុយយកកាក់អីទេ បើសិនជាមានអ្នកប្រព្រឹត្តិបែបនេះ និងត្រូវជាប់ទោស ហើយសូមបងប្អូនប្រជាពលរដ្ឋរាយការណ៍អាជ្ញាធរឃុំ ស្រុក ឬប្រធានមន្ទីរសុខាភិបាលខេត្តអំពីគ្រូពេទ្យឈ្មោះអីដែលបានទាលុយពីបងប្អូននោះ ។
ក្នុងឱកាសនោះដែរ លោក ច័ន្ទ សារុន សូមថ្លែងអំណរគុណយ៉ាងជ្រាលជ្រៅបំផុតចំពោះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាដែលបានផ្តល់វ៉ាក់សាំងតាមរយៈក្រសួងសុខាភិបាល ដើម្បីមកធ្វើការចាក់ជូនប្រជាពលរដ្ឋ ដោយឥតគិតថ្លៃ ដោយមានកិច្ចសហការជាមួយនឹងអាជ្ញាធរមូលដ្ឋាន និងក្រុមគ្រូពេទ្យរបស់មន្ទីរសុខាភិបាលខេត្តបានយ៉ាងល្អប្រសើរ ។
សូមបញ្ជាក់ដែរថា រដ្ឋបាលខេត្តតាកែវ បានរៀបចំចាក់វ៉ាក់សាំង ប្រភេទ ស៊ីណូវ៉ាក់ ចាក់ជូនពលរដ្ឋ នៅទូទាំងស្រុកត្រាំកក់ ចាប់ពីអាយុ ១៨ឆ្នាំឡើងទៅដោយក្រុមគ្រូពេទ្យ នៃមន្ទីរសុខាភិបាលខេត្ត សហការណ៍ជា អាជ្ញាធរមូលដ្ឋាន ដែលមាន ២៦ទីតាំង ទូទាំងស្រុកត្រាំកក់ ដោយចាប់ពីថ្ងៃទី២៩ ខែមិថុនា ចាប់ពីពេលព្រឹក ម៉ោង ៧នឹង៣០នាទី ដល់ម៉ោង១១ និង៣០នាទី និងពេលរសៀលចាប់ ពីម៉ោង១៣និង០០នាទី ដល់ម៉ោង១៦និង០០នាទី ដោយបងប្អូនភ្ជាប់មកជាមួយនូវ អត្តសញ្ញាណប័ណ្ណ សញ្ជាតិខ្មែរ ឬលិខិតឆ្លងដែន សំបុត្រកំណើត សៀវភៅគ្រួសារ ឬឯកសារបញ្ជាក់អត្តសញ្ញាណតែប៉ុណ្ណោះនឹងអាចចាក់ថ្នាំបានហើយ៕
