រាជធានីភ្នំពេញ ៖ កម្មករ-កម្មការិនីរោងចក្រចំនួន២១៣នាក់ ដែលបម្រើការងារនៅក្នុងរោងចក្រកាត់ដេរសម្លៀកបំពាក់ «ជេអេចហ្គាមិនខេមបូឌា» ដែលមានទីតាំងស្ថិតនៅភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ បានរកឃើញមានវិជ្ជមានកូវីដ១៩ បន្ទាប់ពីមានកម្មករប៉ុន្មាននាក់ដំបូងបានកើតជំងឺនេះ ។
នៅវេលាពេញមួយថ្ងៃ គឺថ្ងៃទី២៨ ខែមិថុនា ឆ្នាំ២០២១នេះ ក្រុមគ្រូពេទ្យ TYDA សហការជាមួយក្រុមអាជ្ញាធរមូលដ្ឋាន បានចុះយកសំណាកលើក្រុមកម្មករ កម្មការិនីនៅក្នុងរោងចក្រដែលសរុបចំនួន៨១៧នាក់ ក្នុងចំណោមកម្មករសរុប៩៦៤នាក់ ។ ជាលទ្ធផលពេញមួយថ្ងៃ នៃការតេស្តសំណាក ឃើញថា មានកម្មករ កម្មក្មការិនីរោងចក្រចំនួន២១៣នាក់ មានវិជ្ជមានកូវីដ១៩ ។
ក្រោយពីពិនិត្យឃើញហើយនោះ ពួកគេក៏ត្រូវបានបញ្ជូនទៅព្យាបាលផងដែរ ។ ដោយឡែក អ្នកដែលបានឆ្លងកាត់ការតេស្តសំណាកហើយនោះ ក្រុមគ្រូពេទ្យ បានតម្រូវអោយពួកគេធ្វើចត្តាឡីស័ករយៈពេល១៤ថ្ងៃដោយខ្លួនឯង នៅតាមទីសំណាក់ ឬលំនៅឋានរៀងៗខ្លួននីមួយៗ ។
សូមបញ្ជាក់ថា នៅវេលាម៉ោង១២រសៀល ថ្ងៃទី២៩ ខែមិថុនា ឆ្នាំ២០២១នេះ ក្រុមអាជ្ញាធរចម្រុះខណ្ឌមានជ័យ នឹងចុះទៅពិនិត្យដល់ទីតាំងរោងចក្រ ដើម្បីធ្វើការវាយតម្លៃថា តើត្រូវបន្តអនុញ្ញាតអោយមានការដំណើរសង្វាក់អាជីវកម្ម ឬអោយបិទ ឬមួយក៏អោយដំណើរការក្នុងកាលៈទេសៈណាមួយសមស្របនោះ ខណៈពេលដែលកម្មករដែលវិជ្ជមានកូវីដ គឺស្ថិតនៅក្នុងតួលេខខ្ពស់ ៕
