ភ្នំពេញៈ កាលពីរសៀល ថ្ងៃទី១៦ ខែវិច្ឆិកា ឆ្នាំ២០២១ លោក រស់ សាម៉ីឌី ចៅក្រមជំនុំជម្រះ សាលាដំបូងរាជធានីភ្នំពេញ បានប្រកាសសាលក្រម ផ្តន្ទាទោស លើជនជាប់ចោទ ពាក់ព័ន្ធសំណុំរឿង អំពើឃាតកម្ម ដោយទារុណកម្ម និងរំលោភសេពសន្ថវៈ ដាក់គុកអស់មួយជីវិត ។ សាលក្រមនេះ បានទុកសិទ្ធិឲ្យជនជាប់ចោទ ប្តឹងឧទ្ធរណ៍ តាមកំណត់ច្បាប់ ។
ជនជាឃាតក មានឈ្មោះ អុន ភាមុន ភេទប្រុស អាយុ៣០ឆ្នាំ មានលំនៅ នៅក្រោយ វត្តជ្រោយអំពិល ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
គួររម្លឹកថា លោក ប្លង់ សុផល ព្រះរាជអាជ្ញារង នៃអយ្យការ អមសាលាដំបូង រាជធានីភ្នំពេញ កាលពីថ្ងៃទី៩ ខែមេសា ឆ្នាំ២០២១ នេះ បានសម្រេចចោទប្រកាន់ ជនជាឃាតក សម្លាប់ក្មេង ប្រុស អាយុ១០ ពីបទឃាតកម្ម ដោយមានទារុណកម្ម អំពើឃោរឃៅ ឬអំពើរំលោភសេព សន្ថវៈ តាមមាត្រា ២០៥ នៃក្រមព្រហ្មទណ្ឌ ។
បទល្មើស ដូចមានចែងតាមមាត្រា ខាងលើនេះ ជនណា ដែលបានប្រព្រឹត្តនូវអំពើឃាតកម្ម ដោយមានទារុណកម្ម អំពើឃោរឃៅ ឬអំពើរំលោភសេពសន្ថវៈ ជាឃាតកម្ម ដែលកើតក្នុង ពេល ឬ ក្រោយពេលប្រព្រឹត្ត អំពើទារុណកម្ម ឬ អំពើឃោរឃៅ ឬ អំពើរំលោភសេពសន្ថវៈ នោះ ច្បាប់តម្រូវផ្តន្ទាទោស ដាក់ពន្ធនាគារ អស់មួយជីវិត ។
បន្ទាប់ពីចោទប្រកាន់ជាផ្លូវការហើយ តំណាងអយ្យការ បានចាត់បញ្ជូនទៅខាង ចៅក្រមស៊ើបសួរ ដើម្បីសម្រេចឃុំខ្លួន ជនសង្ស័យ ដាក់ពន្ធនាគារ ជាបណ្តោះអាសន្ន ។
សូមរម្លឹកទៀតថា កាលពីថ្ងៃទី៧ ខែមេសា ឆ្នាំ២០២១ លោកវរសេនីយ៍ឯក ម៉ៅ សឿត អធិការ នគរបាល ខណ្ឌច្បារអំពៅ បានថ្លែងប្រាប់អ្នកសារព័ត៌មានឲ្យដឹងថា ក្រោយការសាកសួរ លើឃាតក (ជាបងថ្លៃជីដូនមួយ) ពាក់ព័ន្ធករណីសម្លាប់កុមារ អាយុ១០ឆ្នាំ នៅក្នុងព្រៃត្រែង តាមបណ្តោយផ្លូវថៃហ្គ័រ ក្នុងភូមិរបោះអង្កាញ់១ សង្កាត់ព្រែកឯងនោះ ជនសង្ស័យ បានឆ្លើយ សារភាពថា ខ្លួនពិតជាបានធ្វើសកម្មភាព រំលោភសេពសន្ថវៈ លើក្មេងប្រុស ឈ្មោះ ជា ប៊ុនហេង អាយុ១០ឆ្នាំ មានលំនៅ ក្នុងសង្កាត់ក្បាលកោះ ខណ្ឌច្បារអំពៅ ពិតប្រាកដមែន ។
លោកអធិការ បានបន្តថាៈ ដើមចម គឺឃាតក បានរៀបគម្រោងសម្លាប់ក្មេងប្រុសរងនោះ ដោយសាររូបគេ ខឹងឪពុកម្តាយកុមាររងគ្រោះ តែងតែមើលងាយ មើលថោករូបគេ ថាជាមនុស្សខ្ជិល មិនចេះរកស៊ី និងគ្មានការងារធ្វើ ។ អង្គហេតុ កាលពីរសៀលថ្ងៃទី ៣១ ខែមីនា ឆ្នាំ២០២១ ជនជាឃាតក ជាសាច់ថ្លៃ បានរៀបចំគម្រោង រួចជាស្រេច ដើម្បីនាំជនរងគ្រោះ ទៅរំលោភសម្លាប់ បន្ទាប់ពីដឹងថា ក្មេងប្រុសនោះ កំពុងជិះកង់លេង តែម្នាក់ឯង នៅក្នុងវត្ត។ ជនសង្ស័យ បានជិះម៉ូតូមួយគ្រឿង ម៉ាក MSX ពណ៌ស ស្លាកលេខ ភ្នំពេញ 1FJ- 8384 ទៅបបួលជនរងគ្រោះ រកទិញប្រហិតញុំា នៅម្តុំផ្លូវថៃហ្គ័រ រួចជនសង្ស័យ បានជិះម៉ូតូ ឌុបជនរងគ្រោះ ចេញទៅ ដោយនាំគ្នាញាុំប្រហិត នៅលេីម៉ូតូបណ្តើរ ។ ពេលកំពុងជិះម៉ូតូ ជាមួយគ្នានោះ ជនរងគ្រោះ បានវាយក្បាលជនសង្ស័យ ពីក្រោយចំនួន ២ ដៃ ជាហេតុធ្វើឲ្យជនសង្ស័យ កើតចិត្តខឹងខ្លាំង គួបផ្សំគំនុំចាស់ ដែលដក់ក្នុងចិត្តស្រាប់ផង ទើបជនសង្ស័យជិះម៉ូតូ ទៅឈប់នៅកន្លែងស្ងាត់មួយ ហើយគេបាននិយា យលួងលោម បញ្ចុះបញ្ចូលជនរងគ្រោះ ឲ្យចុះទៅបេះក្រអៅឈូក ជាមួយគេ។ ពេលនោះ ជនសង្ស័យ ក៏ធ្វើសកម្មភាពស្រាតខោជនរងគ្រោះ ប៉ុនប៉ងរំលោភសេពសន្ថវៈ តែត្រូវក្មេងប្រុសនោះប្រកែក ទើបបានធ្វើឲ្យជនសង្ស័យ វាយជនរងគ្រោះ ២ ដៃ ដួលផ្កាប់មុខទៅលើដី។ ភ្លាមនោះ ជនសង្ស័យ ក៏ស្ទុះទៅកាច់មែក ឈេីធំល្មម យកមកធ្វើសកម្មភាព វាយក្បាលជនរងគ្រោះ បន្ថែមទៀត និងចាក់ត្រង់ពោះ បណ្តាលឲ្យក្មេងប្រុសនោះ ស្លាប់តែម្តងទៅ ។
ពេលសម្លាប់ក្មេងប្រុសនោះហើយ ជនសង្ស័យ ធ្វើសកម្មភាពរំលោភម្តងទៀត តែដោយសារ រូបគេ ភ័យពេក ការរំលោភសេពសន្ថវៈ មិនបានសម្រេចទេ បន្ទាប់មក ជនសង្ស័យ បានជិះម៉ូតូ គេចខ្លួន ទៅសំងំក្នុងផ្ទះ នៅក្រោយវត្តជ្រោយអំពិល និងធ្វើដូចជា គ្មានរឿងអ្វីកើតឡើង ។
នៅយប់ថ្ងៃដែល ជនសង្ស័យ បានសម្លាប់ជនរងគ្រោះហើយ រូបគេបានសម្តែងធ្វើជាចិត្តល្អ ជួយជូនឪពុកម្តាយបង្កើត ដើររកក្មេងប្រុសនោះ ក្រោយពីបាត់ខ្លួន មិនឃើញចូលផ្ទះ ។
ប៉ុន្តែនៅពេលបាត់ខ្លួនកូនប្រុស អាណាព្យាបាល បានទៅដាក់ពាក្យបណ្តឹង ដល់សមត្តកិច្ច ទើបដល់ថ្ងៃទី៥ ខែមេសា ឆ្នាំ២០២១ កម្លាំងនគរបាលព្រហ្មទណ្ឌ ក្រសួងមហាផ្ទៃ ដឹកនាំដោយលោក ឧត្តមសេនីយ៍ទោ ជាវ វិបុល បានចុះទៅសហការ ជាមួយការិយាល័យ ព្រហ្មទណ្ឌកម្រិតធ្ងន់ រាជធានីភ្នំពេញ និងនគរបាលខណ្ឌច្បារអំពៅ ដោយមានការជ្រោមជ្រែង ពីសំណាក់អង្គភាពការពារកុមារ (CPU) ស្រាវជ្រាវឈានដល់ការឃាត់ខ្លួនជនសង្ស័យតាម រយៈកាមេរ៉ាសុវត្តិភាព ។ ក្រោយពីឃាត់ខ្លួន ជនជាឃាតក នារសៀលថ្ងៃទី៦ ខែមេសា កម្លាំងសមត្ថកិច្ច បាននាំជនសង្ស័យ ទៅធ្វើត្រាប់ អំពីសកម្មភាពវាយ សម្លាប់ក្មេងប្រុស រងគ្រោះ នៅកន្លែងកើតហេតុ ខណៈមានមនុស្សកុះករ ទៅចោមរោមមើល ។
សូមបញ្ជាក់ទៀតថា សពក្មេងប្រុស អាយុ១០ឆ្នាំ នោះ ត្រូវបានប្រជាពលរដ្ឋ អ្នកដើររកឃ្មុំ ប្រទះឃើញដេកស្លាប់ អាក្រាតកាយ ក្នុងព្រៃត្រែង មួយកន្លែង ស្ថិតក្នុងដីឡូតិ៍គ្មានលេខ តាមបណ្តោយផ្លូវថៃហ្គ័រ ក្នុងភូមិរបោះអង្គាញ់១ សង្កាត់ព្រែកឯង ខណ្ឌច្បារអំពៅ រាធានីភ្នំពេញ កាលវេលាម៉ោង ១១ និង៣០នាទី ថ្ងៃទី២ ខែមេសា ឆ្នាំ២០២១ ដោយសភាពហើម ស្អុយរលួយ មើលលែងចង់ស្គាល់ ។ ប៉ុន្តែសពនោះ ក៏ត្រូវបានអាណាព្យាបាល កំណត់ថា ជាកូនប្រុសរបស់គាត់ ៕
