ភ្នំពេញ៖ វ៉ាក់សាំងប្រយុទ្ធប្រឆាំងនឹងជំងឺកូវីដ១៩ស៊ីណូហ្វាមចំនួន ១ លានដូសបន្ថែមទៀតដែលរាជរដ្ឋាភិបាលកម្ពុជាបានបញ្ជាទិញពីក្រុមហ៊ុនចិនបាន ដឹកមកដល់កម្ពុជាហើយនៅវេលាម៉ោង១០ ព្រឹកថ្ងៃអង្គារ ទី០៦ ខែកក្កដា ឆ្នាំ២០២១នេះ។
បើតាមការបញ្ជាក់របស់សម្តេចតេជោហ៊ុន សែន នាយករដ្ឋមន្ត្រីនៃកម្ពុជាកាលពីថ្ងៃទី០១ ខែកក្កដា បានថ្លែងឲ្យដឹងថាក្នុងខែកក្កដា នេះ វ៉ាក់សាំងពីប្រទេសចិននឹងមក ដល់កម្ពុជាចំនួន៥លានដូស។ ក្នុងនោះនៅថ្ងៃទី៦ ខែកក្កដាចំនួន ១លានដូស ។នៅថ្ងៃទី១០ ខែកក្កដាមកដល់ចំនួន៤លានដូសក្នុងនោះ១លានដូសជាស៊ីណូហ្វាមហើយ ៣លានដូសជាស៊ីណូវ៉ាក់ ដែលរាជរដ្ឋាភិបាលបានបញ្ជាទិញពីក្រុមហ៊ុនចិន ។
ដោយឡែកនៅខែសីហាខាងមុខនេះកម្ពុជានឹងទទួលបានវ៉ាក់សាំងស៊ីណូវ៉ាក់ចំនួន ៤ លានដូសបន្ថែមទៀត។វ៉ាក់សាំងដែលកម្ពុជាទទួលបានក្នុងខែកក្កដានិងខែសីហា នេះគឺជាចំនួនវ៉ាក់សាំងគម្រប់ជាង ២០លានដូសដែលបានកំណត់ក្នុងផែនការរបស់រាជរដ្ឋាភិបាលក្នុងការរកយកមកចាក់ជូនប្រជាពលរដ្ឋ។
គិតត្រឹមថ្ងៃទី ៦ កក្កដា នេះកម្ពុជាទទួលបានវ៉ាក់សាំងសរុប ១២,០២៤,០០០ រួចហើយភាគច្រើនបំផុតជាវ៉ាក់សាំងជំនួយនិងទិញពីប្រទេសចិន ។ វ៉ាក់សាំងដែលកម្ពុជាទទួលបានរួចមកហើយនោះរួមមានវ៉ាក់សាំងស៊ីណូហ្វាម(Sinopharm)ជាជំនួយរបស់រដ្ឋាភិបាលចិនចំនួន ២,២ លានដូស,វ៉ាក់សាំងស៊ីណូហ្វាម ២ លានដូសទិញពីក្រុមហ៊ុនស៊ីណូហ្វាម,វ៉ាក់សាំងស៊ីណូវ៉ាក់(Sinovac)ទិញពីប្រទេសចិនចំនួន ៧,៥ លានដូសនិងវ៉ាក់សាំងអាស្ត្រាហ្សេនីកា(Astra Zeneca)ជំនួយរបស់ខូវ៉ាក់ (Covax Facility) តាមអង្គការសុខភាពពិភពលោក (WHO) ចំនួន៣២៤,០០០ដូស ។
គិតត្រឹមថ្ងៃទី០៥ខែកក្កដាកម្ពុជាចាក់វ៉ាក់សាំងជូនប្រជាពលរដ្ឋក៏ដូចជាជនបរទេសនៅកម្ពុជាបានចំនួនជាង៤,៥៩៩,៦៤៨នាក់ហើយស្មើនឹង ៤៦ភាគរយនៃចំនួនប្រជា ពលរដ្ឋត្រូវចាក់វ៉ាក់សាំង ១០ លាននាក់។ក្នុងនោះអ្នកចាក់ដូសទី២ មានចំនួន ៣,៣២៩,៧៣០ នាក់ ។
ទោះបីយ៉ាងនេះក៏ដោយគិតត្រឹមថ្ងៃទី៥ខែកក្កដា២០២១កម្ពុជាមានអ្នកឆ្លងសរុបទូទាំងប្រទេសចំនួន ៥៥,១៨៧ នាក់ក្នុងនោះអ្នកជំងឺនាំចូលពីក្រៅប្រទេសមានចំនួន ៣,៣៤០នាក់,អ្នកជាសះស្បើយមានចំនួន ៤៧,៣៨៦ នាក់ និងមានអ្នកស្លាប់រហូតដល់ទៅ ៧៤៨ នាក់ ។ កម្ពុជាត្រូវបានគេមើលឃើញថាស្តិតក្នុងលំដាប់ទី៧ ក្នុង ចំណោមបណ្តាប្រទេសនៅអាស៊ីអាគ្នេយ៍ ដែលមានអ្នកឆ្លងខ្ពស់ជាងប្រទេសវៀតណាម ឡាវ និងប្រ៊ុយណេតែនៅក្រោម សិង្ហបុរី ភូមា ថៃ ម៉ាឡេស៊ី ហ្វីលិពីន និងឥណ្តូ នេស៊ី។ចំនួនអ្នកស្លាប់វិញគឺជាប់ចំណាត់ថ្នាក់ទី៦ នៅក្នុងតំបន់ ដែលមានអ្នកស្លាប់ដល់ទៅ ៧៤៨ នាក់ខ្ពស់ជាងសិង្ហបុរីដែលមានចំនួនអ្នកឆ្លងខ្ពស់ជាងកម្ពុជាតែសិង្ហ បុរីស្លាប់តែ៣៦នាក់ប៉ុណ្ណោះ ៕
