រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវ និងជំរុញឱ្យម្ចាស់រថយន្ដដែលមិនទាន់បង់ពន្ធប្រញាប់ទៅបង់ពន្ធ និងហាមដាច់ខាតមិនឱ្យមានឡានចង្កួតស្ដាំចរាចរណ៍លើផ្លូវខណៈថ្ងៃកំណត់នៃការអនុគ្រោះពន្ធ១០% សល់ត្រឹមតែ១៥ថ្ងៃទៀត ។
សម្តេចតេជោហ៊ុនសែន បានថ្លែងក្នុងកម្មពីធីសម្ពោធដាក់ឱ្យប្រើប្រាស់ជាផ្លូវការ សណ្ឋាគារ ហាយ៉ាត់ រីជិន ស៊ីភ្នំពេញ«HYATT REGENCY PHNOM PENH» នៅថ្ងៃទី១៥ ខែធ្នូ ឆ្នាំ២០២១នេះ បានអំពាវនាវចំពោះម្ចាស់រថយន្ដដែលមិនទាន់បានបង់ពន្ធ សូមអញ្ជើញមកបង់ពន្ធឱ្យបានរួសរាន់ ដើម្បីទទួលបាននូវការអនុគ្រោះ១០%»។
សម្ដេចតេជោ ក៏បានសង្កត់ថា ៖«មិនឱ្យមានព្រឹត្តិការណ៍ដែលកើតឡើងតទៅទៀតនោះទេ លើរថយន្ដមិនបង់ពន្ធជ្រកក្រោមផ្លាកលេខនេះ ឬផ្លាកលេខនោះ ហើយក៏មិនឱ្យមានវត្តមានរថយន្ដចង្កួតស្ដាំ ចរាចរណ៍បើកលើផ្លូវមិនថា ផ្លូវជាតិ ឬផ្លូវលំ ត្រូវកែវាទៅឆ្វេង» ។
ជាមួយគ្នានោះដែរ សម្ដេចបន្ថែមថា ក្រោយថ្ងៃ៣១ ធ្នូ គឺត្រូវបោះពន្ធពេញដោយមិនទទួលបានការអនុគ្រោះពន្ធ១០%នោះទេ ។ សម្ដេចក៏លើកឡើងថា រឿងរថយន្ដអត់បង់ពន្ធនេះ គឺជារឿងរកស៊ីរត់ពន្ធ ដោយយកឡានមកជិះ ។
សូមរំឮកថា អគ្គនាយកដ្ឋានគយ និងរដ្ឋាករកម្ពុជាបានបញ្ជាក់ថា «អនុលោមតាមលិខិតលេខ ៤៨២ សជណ.ហធ ចុះថ្ងៃទី២ ខែកញ្ញា ឆ្នាំ២០២១ របស់ទីស្តីការគណៈរដ្ឋមន្ត្រី និងយោងតាមសេចក្តីជូនដំណឹងលេខ១៩៨៣/២១ អគរ ចុះថ្ងៃទី១៩ ខែកញ្ញា ឆ្នាំ២០២១ របស់អគ្គនាយកដ្ឋានគយ និងរដ្ឋាករកម្ពុជា (អគរ) ស្តីពីការអនុ វត្តគោលការណ៍ និងយន្តការនៃការប្រមូលពន្ធអាករលើរថយន្តគ្មានពន្ធមានស្រាប់ក្នុងប្រទេសដែលកំពុងជ្រកក្រោមផ្លាកលេខផ្សេងៗ អគរ សូមធ្វើការរំលឹកដល់ម្ចាស់រថយន្តពាក់ព័ន្ធ មេត្តាជ្រាបថាការអនុគ្រោះបន្ធូរបន្ថយប្រាក់ពន្ធ-អាករចំនួន ១០ភាគរយ សម្រាប់រថយន្តចង្កូតឆ្វេងនឹងត្រូវដល់ឱសានវាទត្រឹមថ្ងៃទី៣១ ខែធ្នូ ឆ្នាំ២០២១ខាងមុខនេះ»៕
