សមត្ថកិច្ចស្រុករុក្ខគីរី បានប្រាប់ឲ្យដឹង នៅថ្ងៃទី ២១ ខែតុលានេះថា÷ ករណីប្រជាពលរដ្ឋ លង់ទឹកស្ទឹង បណ្តាលឲ្យស្លាប់នេះ បានកើតឡើង នៅល្ងាចថ្ងៃទី ២០ ខែតុលា ឆ្នាំ២០២១ ត្រង់ចំណុចទំនប់ ស្ទាក់ទឹកស្ទឹងដូនទ្រី ក្នុងក្រុមទី ៨ ភូមិកែវមុន្នី ឃុំបាសាក់ ស្រុករុក្ខគិរី ខេត្តបាត់ដំបង។
យុវជនរងគ្រោះ មានឈ្មោះ ធី ធិ អាយុ ២៤ ឆ្នាំ រស់នៅភូមិអូររំចេក ឃុំបាសាក់ ស្រុករុក្ខគិរី ជាកម្មករ ធ្វើការនៅក្នុងក្រុមហ៊ុន សាងសង់ទំនប់ ស្ទាក់ទឹកស្ទឹងដូនទ្រី។ ជនរងគ្រោះ ជាមួយបក្ខពួកចំនួន ៤ នាក់ផ្សេងទៀត នៅថ្ងៃកើតហេតុ បានវិលត្រឡប់ មកពីធ្វើការវិញ បានហែលឆ្លងទឹកស្ទឹង ដូចសព្វដង ក៏ស្រាប់តែទឹកហូរកួច លិចទៅតាមខ្សែទឹកបាត់ភ្លាមៗ ទោះជាកម្លាំងនគរបាលស្រុក សហការជាមួយ នគរបាលប៉ុស្ត៍ រួមទាំងកម្លាំងអន្តរាគមន៍ វរសេនាតូច ស៊ើបការណ៍ យោធភូមិភាគទី៥ ជាច្រើននាក់ ប្រឹងប្រែងចុះរុករក ស្ទើរពេញ មួយយប់ ក៏នៅតែរកមិនឃើញ លុះដល់ព្រឹកឡើង ថ្ងៃទី ២១ ខែតុលា វេលាម៉ោង ៨:០០ នាទីព្រឹក ទើបរកឃើញ៕
