រាជធានីភ្នំពេញ ៖ មន្ត្រីជាន់ខ្ពស់ក្រសួងសុខាភិបាលបានបញ្ជាក់ថា ការដែលរាជរដ្ឋាភិបាលសម្រេចផ្អាកពិធីបុណ្យកាន់បិណ្ឌ និងភ្ជុំបិណ្ឌ ជាការសម្រេចដ៏ត្រឹមត្រូវពីព្រោះដើម្បីស្កាត់ការរីករាលដាលជំងឺកូវីដ១៩ ប៉ុន្តែពលរដ្ឋអាចយកចង្ហាន់ ឬទេយ្យទានទៅប្រគេន ព្រះចៅអធិការវត្ត ឬគណៈកម្មការវត្ត ដើម្បីចាក់ចែងក្នុងវត្តបាន ។
លោកជំទាវ យក់ សម្បត្តិ រដ្ឋលេខធិការក្រសួងសុខាភិបាលបានបញ្ជាក់នៅព្រលានយន្តហោះអន្តរជាតិភ្នំពេញ ខណៈទៅទទួលវ៉ាក់សាំងស៊ីណូវ៉ាក់ចំនួន៣លានដូស ដែលរដ្ឋាភិបាលបញ្ជាទិញពីក្រុមហ៊ុនស៊ីណូវ៉ាក់ នាព្រឹកថ្ងៃទី២៤ ខែកញ្ញា ឆ្នាំ២០២១ថា ទោះបីជាកម្ពុជាបានចាក់វ៉ាក់សាំងការពារជំងឺកូវីដ១៩ មានចំនួនច្រើនគឺជិត១០០%បើធៀបនឹងប្រទេសដទៃ ដោយចាក់លើមនុស្សពេញវ័យ និងចាស់ ហើយចាក់ជូនកុមារជាបន្តបន្ទាប់ ក្នុងរយៈពេលប៉ុន្មានថ្ងៃមកនេះចំនួនអ្នកឆ្លងជំងឺកូវីដ១៩នៅតែកើតមានច្រើន ពិសេសនោះប្រភេសវីរុសដែលតា បានកំពុងវាយលុងនៅតាមបណ្តាខេត្តជាប់ ព្រំដែនជាពិសេសនោះខេត្តសៀមរាប ។
លោកជំទាវក៏បានលើកឡើងថា ការសម្រេចបិទផ្អាកពិធីបុណ្យកាន់បិណ្ឌ និងភ្ជុំបិណ្ឌ គឺរាជរដ្ឋាភិបាលធ្វើដើម្បីទប់ស្កាត់រីករាលដាលជំងឺកូវីដ១៩ ពិសេសនៅក្រោយភ្ជុំហើយប្រជាពលរដ្ឋមានផ្ទុកជំងឺកូវីដ១៩ ។ លោកជំទាវបញ្ជាក់ថា ៖«រាជរដ្ឋាភិបាលធ្វើបែបនេះដើម្បីទប់ស្កាត់ការរីករាលឆ្លងជំងឺកូវីដ១៩ទាន់ពេលវេលា ពីព្រោះហើយយមិនចង់ឲ្យថាក្រោយពីភ្ជុំហើយប្រជាពលរដ្ឋយើងទទួលផលវិបាកនៃការផ្ទុកមេរោគកូវីដ១៩ ។ ដូច្នេះហើយការសម្រេចរបស់សម្តេចតេជោ គឺជាការសម្រេចត្រឹមត្រូវបំផុត ដើម្បីជួយឲ្យមានការទប់ស្កាត់ការរាតត្បាតជំងឺកូវីដ១៩ មានការគ្រប់ក្រងបានល្អ»។
ក្នុងឱកាសនោះដែរ លោកជំទាវរដ្ឋលេខាធិការក៏បានលើកឡើងថា ទោះបីជាមានការផ្អាកធ្វើពិធីបុណ្យកាន់បិណ្ឌ និងភ្ជុំបិណ្ឌក្តី ប៉ុន្តែប្រជាពលរដ្ឋបើចង់ដាក់នៅវត្តអាចយកទេយ្យទាន ឬចង្ហាន់ទៅប្រគេនចៅអធិការវត្ត ឬក៏គណៈកម្មការវត្តផ្ទាល់តែម្តង ហើយទុកព្រះសង្ឃចាត់ចែងដោយខ្លួនព្រះសង្ឃផ្ទាល់។
លោកជំទាវថា៖«ដូច្នេះឯងការធ្វើបែបនេះគឺយើងអាចទប់ស្កាត់ការរាតតត្បាតក៏ដូចជា ការចម្លងជំងឺកូវីដ១៩ ។ ពីព្រោះយើងដឹងហើយថា បើបណ្តោយឲ្យប្រជាពលរដ្ឋដាក់បិណ្ឌជារៀងរាល់ថ្ងៃអាចមានករណីឆ្លងពីវត្តមកក្រៅ ឬពីក្រៅទៅក្នុងវត្តធ្វើឲ្យពិបាកទប់ស្កាត់» ។
ទាក់និនករណីយកចង្កាន់ ឬទេយ្យទានផ្សេងទៅប្រគេនព្រះចៅអធិការវត្ត ឬគណៈកម្មការវត្តកោះសន្តិភាពបានធ្វើការបញ្ជាក់ពីអ្នកនាំពាក្យក្រសួងធម្មការលោក សេង សុមុនី ដោយទូរស័ព្ទគ្មានអ្នកទទួល ។ យ៉ាងណាក្តី នៅថ្ងៃទី២៤ ខែកញ្ញា ឆ្នាំ២០២១ ក្រសួងធម្មការ និងសាសនា បានណែនាំមន្ទីរធម្មការ និងសាសនារាជធានី-ខេត្ត ត្រូវសម្របសម្រួលជាមួយយន្ដ ការពាក់ព័ន្ធទាំងអស់ ដើម្បីធានាដល់ការនាំយកចង្កាន់ និងទេយ្យវត្ថុចាំបាច់នានា ប្រគេនព្រះសង្ឃតាមបណ្ដាវត្តអារាម បន្ទាប់ពីរាជរដ្ឋាភិបាល ប្រកាសផ្អាករៀបចំពិធីបុណ្យកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
យោងតាមសេចក្ដីណែនាំរបស់ ក្រសួងធម្មការ បានឲ្យដឹងថា មន្ទីរធម្មការ និងសាសនារាជធានី-ខេត្តសហការជាមួយព្រះមេគណ ព្រះមន្ត្រីសង្ឃគ្រប់ឋានានុក្រម អាជ្ញាធរដែនដីគ្រប់លំដាប់ថ្នាក់ ផ្សព្វផ្សាយដល់គ្រប់វត្ដអារាមនៅទូទាំងប្រទេសនូវសេចក្តីសម្រេចរបស់រាជរដ្ឋាភិបាល ស្តីពីផ្អាកការរៀបចំពិធី បុណ្យកាន់បិណ្ឌ និងភ្ជុំបិណ្ឌ ចាប់ពីបិណ្ឌ៤ រហូតដល់ថ្ងៃភ្ជុំបិណ្ឌ។
ក្រសួង បានបន្ដថា ផ្សព្វផ្សាយដល់គ្រប់វត្តអារាម និងវិហារពាហិរសាសនា ត្រូវអនុវត្តនូវវិធានការ ការពារនានារបស់ ក្រសួងសុខាភិបាលឱ្យបានខ្ជាប់ខ្ជួន ជាពិសេស ត្រូវប្រកាន់ភ្ជាប់ជានិច្ចនូវវិធានការ «៣ការពារ ៣ របស់រាជរដ្ឋាភិបាល។
ក្រសួង បានបញ្ជាក់ថា «ត្រូវសហការជួយសម្របសម្រួលជាមួយយន្តការដែលមានការ ពាក់ព័ន្ធទាំងអស់ ដើម្បីធានា ដល់ការនាំយកចង្ហាន់ និងទេយ្យវត្ថុចាំបាច់នានា ប្រគេនដល់ព្រះ សង្ឃនៅតាមបណ្តាវត្តអារាមនានា»។
សូមរំលឹកថា កាលពីថ្ងៃទី២៣ កញ្ញា រាជរដ្ឋាភិបាល បានចេញសេចក្តីសម្រេចផ្អា កការរៀបចំពិធីបុណ្យកាន់បិណ្ឌ និងភ្ជុំបិណ្ឌ ចាប់ពីបិណ្ឌ៤ រហូតដល់ថ្ងៃភ្ជុំបិណ្ឌ ដើម្បីបង្ការ និងទប់ស្កាត់ជំងឺកូវីដ១៩ ដែលកំពុងវាយលុកខ្លាំង នាពេលបច្ចុប្បន្ន៕
