រាជធានីភ្នំពេញ ៖ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកជំទាវ ភឿង សកុណា បានមានប្រសាសន៍ប្រាប់ស្ថានីយ៍ទូរទស្សន៍ក្នុងស្រុកនៅយប់ថ្ងៃទី៥ ខែកក្កដា ឆ្នាំ២០២១ថា «ក្រសួងវប្បធម៌ និងវិចិត្រសិល្បៈ នឹងទាក់ទងទៅស្ថានឯកអគ្គរាជទូតកម្ពុជា ប្រចាំនៅប្រទេសថៃ ដើម្បីស្រាវជ្រាវឲ្យបានច្បាស់លាស់ជាមុនសិន ករណីដែលថា មានការសាងសង់ប្រាសាទ ដូចអង្គរវត្តរបស់កម្ពុជា នៅលើទឹកដីថៃ » ។
តាមការផ្សព្វផ្សាយនៅក្នុងបណ្ដាញសង្គមហ្វេសប៊ុកនៅកម្ពុជា បានបង្ហាញថា មានគំរូប្លង់ ដូចប្រាសាទដូចអង្គរវត្តរបស់កម្ពុជា ដែលកំពុងសាងសង់នៅទឹកដីថៃ ដែលចម្លងចេញពីរូបរាងប្រាសាទអង្គរវត្ត គឺស្ថិតនៅឯវត្តភូម៉ានហ្វា ក្នុងខេត្តបុរីរ៉ាំ ប្រទេសថៃ ។ បន្ទាប់ពីទទួលជោគជ័យក្នុងការកសាងប្រាសាទនានា ក្នុងវត្តនោះរួចមក គម្រោងបន្ទាប់ គឺការកសាងប្រាសាទអង្គរវត្តទី២ ឬប្រាសាទ ដែលគេប្រសិទ្ធនាមថា ប្រាសាទសីហនគរ (ปราสาทสีหนคร) គ្រោងនឹងបញ្ចប់ការសាងសង់ រវាងពី ៧ឆ្នាំ ទៅ៨ឆ្នាំទៀត ។
ដោយឡែកពាក់ព័ន្ធបញ្ហាខាងលើនេះ អ្នកនាំពាក្យក្រសួងវប្បធម៌ និងវិចិត្រសិល្បៈ លោក ឡុង ប៉ុណ្ណាសិរីវឌ្ឍ បានអះអាងប្រាប់កោះសន្តិភាពតាមសារអេឡិចត្រូនិចនៅថ្ងៃនេះថា ជាជំហានដំបូង ភាគីខាងបច្ចេកទេសក្រសួង រួមជាមួយអាជ្ញាធរអប្សរា បាននិងកំពុងស្វែករកព័ត៌មានបន្ថែម ជាមុនសិន ។
លោកបញ្ជាក់ថា ដំបូងយើងបានដឹងថា ភាគីថៃ បានកសាងប្រាសាទ ដែលមានកំពូលបី ដូចប្រាសាទអង្គរខ្មែរ ហេតុនេះ យើងកំពុងស្វែងអ្នកបច្ចេកសិក្សាទៅប្លង់មេនេះ ដើម្បីបានព័ត៌មានជាក់លាក់ជាមុនសិន ។
លោកបន្ថែមថា ប្រសិនបើយើងសិក្សាបានច្បាស់លាស់ហើយនោះ ក្រសួងនឹងមានវិធានការតាមផ្លូវច្បាប់ និងបទដ្ឋានគតិយុទ្ធនានា ដែលបានចែង ក្នុងពេលដែលមានការសាងសង់យកលំនាំតាមប្រាសាទបុរាណខ្មែរ ដោយគ្មានការអនុញ្ញាតបែបនេះ ។
លោក ឡុង ប៉ុណ្ណាសិរីវឌ្ឍ បានឲ្យដឹងបន្ថែមទៀតថា យើងកំពុងសិក្សាបញ្ហានេះ ឲ្យបានច្បាស់លាស់ថា ភាគីថៃ គេសាងសង់យកតាមលំនាំប្រាសាទខ្មែរយើងទាំងស្រុង ឬមានប្លង់បែបផែនផ្សេង ?
លោកបញ្ជាក់ថា ឥឡូវនេះ ជាជំហានដំបូង គឺដឹងព័ត៌មានថា ភាគីថៃ គេសាងសង់ជាពុទ្ធមណ្ឌលមួយ ។ យ៉ាងណា បើតាមលោក ឡុង ប៉ុណ្ណាសិរីវឌ្ឍ បច្ចុប្បន្នអាជ្ញាធរអប្សរា បានទាក់ទងតាមប្រព័ន្ធអេឡិចត្រូនិចទៅកាន់ភាគីអ្នកចេញគំរូប្លង់មេ របស់ថៃ ហើយក៏បានទាក់ទងទៅកាន់ស្ថានទូតកម្ពុជា ប្រចាំប្រទេសថៃ ដើម្បីប្រមូលព័ត៌មានឲ្យបានច្បាស់ មុនឈានដល់ដំណោះស្រាយ និងចំណាត់ការច្បាប់ណាមួយ ៕
